Not Chosen

პარფიუმერების — პაოლო და ტიციანა ტერენცების ბავშვობის ყველაზე მხიარული და უდარდელი, შთამაგონებელ მოგზაურობა ულამაზეს სიცილიას უკავშირდება და სწორედ მას ეძღვნება Tiziana Terenzi-ს პარფიუმის ექსტრაქტი Arethusa-ც („არეტუზა“. იგულისხმება ბერძნული მითოლოგიის ნიმფა, რომელიც არკადიიდან გაიპარა, ზღვა გადაცურა და სირაკუზის კუნძულ ორტიგიაზე მტკნარი წყლის შადრევანის ფორმით გამოჩნდა).

სიცილია ადგილია, სადაც ემოციების მომაჯადოებელ ზღვაში, ერთმანეთში იხლართება ისტორია, ხელოვნება და ბუნება. ხმელთაშუა ზღვის ამ ერთ-ერთ ყველაზე იდუმალ და ამავდროულად, იტალიის მშვენიერებებს შორის უძველეს კუნძულს, ჩარჩოსავით აკრავს ველური სანაპიროები, ანტიკური ნანგრევები და ბაროკოს ნაგებობებით გარშემორტყმული მოედნები.

Tiziana Terenzi-ს დახვეწილი ექსტრაქტი — Arethusa, სიცილიის ყოველ ფერადოვან ჰანგს მოიცავს: მისი დაგემოვნებისას, ამაღლებული სურნელის მქონე ყვავილებთან დაწყვილებულ გემრიელი ხილის ნოტებს შეიგრძნობთ, ხმელთაშუა ზღვის მცენარეების არომატულ მერქნებს შორის რომ ფეთქავენ. მათთან ჰარმონიულ კონტრასტს წარმოქმნის სირაკუზსა და ორტიგიაზე გავრცელებული სპეციები.

როგორც პარფიუმერები სურნელის კონცეფციაზე მუშაობის პროცესს განმარტავენ, ეს ქმნილება, საწყის ეტაპზე, წარმოშობისკენ მოგზაურობას წარმოადგენდა, თუმცა, გააზრების შედეგად, შუა ზაფხულის გრილი ღამის გრაციოზული სულისკვეთებისთვის დამახასიათებელ თავბრუდამხვევ სიზმრად იქცა — ზმანებად, რომელიც კომპანიონებთან ერთად, გიტარით ხელში, ზღვის პირას დანთებული კოცონის გარშემო სიმღერის მოგონებებს აცოცხლებს და იმ ადამიანებს გვახსენებს, გულით მუდამ თან რომ ვატარებთ, მიუხედავად იმისა, რომ ფიზიკურად შორს არიან.

არეტუზა ბერძნული მითოლოგიის პერსონაჟია, ნერეუსის და დორისის ქალიშვილი. ის ოკეანუსის ვაჟს — ღვთაება ალფეუსს შეუყვარდა, როდესაც ბანაობისას ჩუმად უთვალთვალებდა; თუმცა, არეტუზამ მისი მხედველობის არიდან მიმალვა შეძლო და თავშესაფარი კუნძულ ორტიგიაზე, სირაკუზში იპოვა, სადაც ქალღმერთმა არტემიდამ წყაროდ აქცია. არეტუზას გაუჩინარებამ შეყვარებული ალფეუსი დაადარდიანა და მისი სევდით შეძრულმა ზევსმა გადაწყვიტა, მდინარედ გადაექცია, პელოპონესის ნახევარკუნძულიდან იონიის ზღვა რომ გაევლო და საყვარელ წყაროს შეერთებოდა.

იტალიის დიდებულ ნავსადგურში — სირაკუზში, არეტუზას ნაკადული ჩაედინება და მისი დამსახურებით, ორტიგიას კუნძულზე დღემდე ცოცხლობს მითი არეტუზასა და ალფეუსის შესახებ.